2Pe 1 | YML | STEP | Yau Saimoni Fita, Iesu Keliso yana tofolova wata 'ana tomata'aulele a vekaiwa 'omi Iesu 'ana tovetumaganavo 'waimie. 'Ada To'ita'ita'i Iesu Keliso 'asa'aiana taunina yada Yaubada, vetumagana i velema yana veimea tonovina 'wainega, 'omi wata bani'odi vetumagananina i velemi, naninina 'ai'aiwabu bwaikina 'waideye.

2 Peter 1

1 Yau Saimoni Fita, Iesu Keliso yana tofolova wata 'ana tomata'aulele a vekaiwa 'omi Iesu 'ana tovetumaganavo 'waimie. 'Ada To'ita'ita'i Iesu Keliso 'asa'aiana taunina yada Yaubada, vetumagana i velema yana veimea tonovina 'wainega, 'omi wata bani'odi vetumagananina i velemi, naninina 'ai'aiwabu bwaikina 'waideye. 2 A vevelu'ui faifaimi nuanuaku yami 'aseta Yaubada wata 'ada Toveimea Iesu faifaidi i na vevebwaika bega ma yadi nuakalikali i na vevesauluva 'atumaina 'waimie wata tutuya matatabuna nuanua bikana mia 'atumaina taiadi i na velevelemi.

S2 Kolos 1:9-10 Fil 3:10

Kebu ta na 'ivemweamweadaga.

3 Yaubada yana toketokena 'wainega nani matatabuna 'akonadi i veleda 'ada fata bega yada mia wata yada sauluva i na ve'atumai yana nuanua bani'odi. Yana 'aivaitanina 'wainega taunina ta 'asetai, kumanina i venua'ivineda, bega yana 'ai'aiwabu magemagetadi wata yana 'atumaina i na veleda. 4 Wata yana toketokenanina 'wainega 'ada nuakalikali bwaikidi wata 'atumaidi i veleda, kumanidiavo faifaidi basenadi i vona'awaufaufa. Nuakalikalinidi 'waidiega taunina yana nuanua wata yana sauluva i veleda nika 'ada fata bunu 'ana nuanua sakoidi 'awasasadeye ta na degedi. 5 Fai naninidi 'atumaidi ta veluagadi Yaubada 'wainega wata fai 'wa vetumagana Keliso 'waineye, begaidi i lubwainemi ma yami tokemaiga 'wa na vevewavawava yami sauluva i na ve'atumai. I na ve'atumaiga 'aseta 'wa na lalauala bega Yaubada yana nuanua 'wa na 'asetadi. 6 'Akonadi 'wa na 'asetaga taunimi yami nuanua 'wa na 'isave'avinidi bega i na nagoga ma yami tokemaiga Yaubada yana nuanua 'wa na 'i'idewadi. 7 'Akonadi yana nuanua 'wa na 'i'i'dewadiga 'ami fata 'wa na veiaiana tomotoga taiadi, i na nagoga nika 'wa na nuakalikaliedi mogitana. 8 'Ai'edi sauluvanidi i na vevebwaika 'waimie 'ada Toveimea Iesu Keliso 'wa na 'asetai mogitana bega yami folova faifaina kebu nani-'avo'avovo, ma vuagina. 9 We'e egavo sauluvanidi kebu 'waidie i da 'eno'enoviga, 'ana 'isa Yaubada yana nuanua kebu i da 'isa'inanadi wata 'akonadi nuadi i fani yadi sauluva sakoidi basenadi i 'idewadiga Iesu i iwalekolekoadi.

10 Ekwavo, 'akonadi 'wa 'asetai Yaubada i venua'ivinemi nuanuana 'omi yana tomotoga, begaidi i lubwainemi 'wa na tokemaigemi sauluvanidi 'atumaidi 'waidie bega yana venua'ivinanina i na 'eno-vagata. 'Ai'edi mogitana bani'odi 'wa na vesauluvediga, kebu 'ana fata Iesu 'wa na baileni wata kebu 'wa na be'u sakona 'waineye, we'e Yaubada ma yana sosoana i na tauyemi mogitana 'wa na luku Iesu Keliso yana 'Eba Veimea miamia-vagaina 'waineye, taunina 'ada Toveimea wata 'ada To'ita'ita'i.

S3 Efe 3:16-19S4 Ion 1:12 Fol 17:28 2 Kol 3:18S5-6 Gal 5:22-23
S9 1 Ion 2:11

Tomata'aulele yadi lu'ivona Keliso faifaina vona mogitana.

12 Naninidi 'akonadi 'wa 'asetadi wata Yaubada yana Vona 'akonadi 'wa nogaidiga 'wa vevematayakeyakedi, siwe fai mogitana Yaubada i venua'ivinemiga begaidi tutuya fuedi a na totolinuata'i 'waimie. 13 Yau sai'afoga fwayafwaya de'e a na 'iaweni bani'odi basenadi 'ada Toveimea Iesu Keliso i voneku. I lubwaineku ma yawaikuye a na vonavona naninidi yami sauluva 'atumaidi faifaidi bega 'wa na nuanuanidi. 15 Begaidi nuanuaku bwaikina a na vewavawava tamu 'eda'eda a na 'idewai bega bola a na 'iawemiga, 'wainega tutuya fuedi naninidi 'wa na nunuave'avinidi.

16 Tutuyanina 'a wai 'waimie 'ada Toveimea Iesu Keliso yana toketokena wata yana vila-vaitugana faifaidi 'a lau'age 'waimie. Yama lau'agenina kebu tomotogaotoga ma yana 'aseta 'ana ifuifufu bega i na vekalieda, Keliso yana 'ai'aiwabu mataududulina taunima matamega 'a 'iseni bega 'a lu'ivona 'waimie. 17 Basenadi Iesu taiadi 'a laka 'oya tabutabuna 'waineye 'a miamia nika Yaubada Tamada awa'ai'ai wata mageta mataududulina i veleni, wata bona 'a nogai Yaubada Magemagetana 'wainega i vo, De'e Natuku nuafouku a nuakalikalieni bwaikina, faifaina a sosoana mogitana.” Vona mogitana 'ima taunima bonanina 'a nogai abamega.

S13-14 2 Kol 5:1 Ion 21:18-19S16-18 Mad 17:1-5

Tolu'ivonavo yadi lu'ivona Keliso faifaina vona mogitana.

19 Basenadiotoga Yaubada yana tolu'ivonavo i vona-vagata Keliso yana mai faifaina. Fai taunima 'a 'iseni 'ada fata ta na vetumagana ta na nuani mogitana tolu'ivonanidi yadi vona matatabuna vona mogitana. Begaidi i lubwainemi yadi vonanidi 'wa na nuanuanidi, 'waimie bani'odi mageta i magemagetai dudubala nageneye. 'Wa na nuanuanidi i na nagoga nika nuami i na magetadi bani'odi Kumauloku i lakalaka tutuya i kilikililia. 20 Vonanidi i maia Yaubada yana tolu'ivonavo 'waidiega kebu taunidi yadi nuanuayega, we'e mogitana 'Anu'anunu 'Atumaina yadi nuanua i 'ona'onadi bega Yaubada yana Vona i lulu'ivoneyedi. Begaidi vona de'e kebu nuami i na fani 'wa na nuanuanidi. Side bani'odi, kebu tamu aitoi 'ana fata 'aise'avana tolu'ivonavo yadi vona Yaubada yana Buki nageneye i na kiavemagetadi, nagami 'Anu'anunu 'Atumaina i na 'ivaiseni.

S19 Luk 1:76-79S20-21 2 Tim 3:16 Fol 3:21